流落民間 (Closed)

又另一個又熱又納悶嘅一日，走嚟西貢食吓lunch先😎吞拿魚沙律雖然係好普通嘅吞拿魚，但賣相絕不馬虎，喺最頂有一舊薯仔，而唔係求其撈埋一碗沙律咁樣；吞拿魚嘅份量非常慷慨，青椒紅椒都非常新鮮爽脆，仲有橄欖添，見你咁有誠意，我唔食橄欖都食哂佢啦！香炸吉列魚柳伴炒飯配日式咖喱汁 ($88)平時唔太鍾意亂咁食吉列嘢，好驚用萬年油炸，又唔鍾意炸漿厚過舊魚，除非，我對嗰間餐廳有信心。見佢嘅配搭咁正有炒飯，試吓先，好在冇令我失望！兩塊魚柳算大，炸得唔算係金黃色，但勝在唔油膩，冇一陣油味，賣相幾好，炸漿唔厚但脆，係緊貼住魚柳，唔會一咬即散，當然我唔expect會係新鮮魚柳，但起碼魚柳冇濃郁嘅雪味；炒飯粒粒分明偏硬身，咖喱汁入面有薯仔粒、車厘茄及紅蘿蔔粒，撈飯食無得頂！果然，吉列食物真係唔可以亂食！店員服務態度非常好，每次我講完“唔該”之後都有講返“唔使客氣”..... 環境舒適，食物好味，服務良好，👏 不枉我千里迢迢嚟食啊！