L'AMOUR

呢間係大埔區出名既fine dining 果然名不虛傳，一見到個門口已經嘩左一聲，佢道門真係值得留意下。入到去既裝修會嘩第二聲，座位、吊燈、枱面佈置同bar枱都高級，絕對係低調高手既隱世餐廳。平時呢啲fine din 都係份量好小，但呢間好唔同，見到啲薯條、豬扒同牛肉都唔小野，而且佢會等你食完先再起下道菜。首先係巴馬臣芝士黑松露薯條，勁大碟，好多黑松露，薯條好大條，熱辣辣好好食。蒜片辣椒蟹肉扁意粉既蟹肉有好多，仲有啲魚子醬係上面，有蒜香又辣辣地咁岩哂我。慢煮西班牙黑毛豬鞍好嫩口，一啲都唔柴，仲要係大大塊，配埋焦糖蘋果更開胃醒神。威選頓牛柳肉質鮮嫩，酥皮既香味入哂啲牛度，酥皮外脆內軟，加上個伴碟咁靚，值得推介下。最後叫個比利時朱古力心太軟作結，暖暖流心既朱古力加上脆香既外皮，黎多個都食得哂。總括黎講，環境舒適有情調，絕對係慶祝紀念日既好地方，食物既份量足夠，fine dinning 既好選擇。