新巴蜀風 (Closed)

今日去完灣仔街市就同左呀媽黎食Lunch。佢同我都係麻辣控，我地叫左三個小菜，一碗飯share。口水雞($188)係媽媽必叫既，佢好中意食呢樣嘢。我就覺得呢樣嘢好行其實，因為間間都差唔多味。但我食完呢間既口水雞之後，叫返頭先果句，因為佢隻雞本身掂，口水辣汁既嘢大同小異，最重要係雞肉鮮甜，個底仲有青瓜，正！我地仲叫左個麻婆豆腐($88)餸飯，結果本身叫一個飯，之後要追加多一個飯，因為個麻婆豆腐太好餸飯喇！佢唔重口味，豆腐好滑，個汁做到比較稠身，小小辣，但個汁好惹味所以餸飯好夾！之後我地好奇想知咩係粉蒸豬肉($100)，就叫左一客試下，店員話係四川人常食既餸菜之一，豬肉係用五花腩，旁邊有南瓜，所謂"粉蒸"，我食左一陣，諗左好耐，原來啲"粉蒸"既肉碎，就係免治肉，加上平時食艇仔粥既牛肉碎夾雜住好似米粉既嘢。五花腩蒸得好鬆化，媽媽好中意食，我就無佢咁重口味，所以食左兩塊已經飽，反而專攻南瓜，好甜好稔，同"粉蒸"夾住一齊食好好味。店員都幾Nice，不停幫手換碟，又問我地中唔中意食，下次帶埋爸爸黎食晚飯先！