Gusto - Taste Italian (Closed)

同朋友去「九龍公園」探索神秘恐龍BB，迷宮種滿了很多靚靚嘅賞葉植物同豔麗時花，打完卡，又係時候食晏。選了冠華中心地下呢間設有室內及戶外座位嘅酒吧餐廳，開放式門面，配以一室紅黑及灰藍裝潢，色澤沉穩，格調高雅。餐廳以一系列精美意大利菜作招徠，除了主食、薄餅、意粉及意大利飯外，還有時令生蠔、海鮮拼盤、串燒、甜點及各式酒水等供應。我哋點咗炸魚薯條同香煎挪威三文魚。炸魚薯條 ($148)  炸魚份量不少，足足有成 5 件，外層嘅粉漿唔厚，食落超脆口。魚肉雪白，結實不韌，而且肉質好嫩滑，入口豐盈多汁。薯條水準亦不俗，炸至金黃色，薯肉香甜綿密，蘸點茄醬同吃，十分滋味。香煎挪威三文魚 ($208)  魚扒嘅賣相好吸引，有手掌般長，而且好厚肉地。外皮煎至微脆，入口帶點油香。魚肉只係輕輕調過味，肉質細嫩，加上火候控制得宜，啱啱夠熟就上碟，所以每一啖都超級滑。伴吃嘅配菜也不欺場，有玉米筍、紫椰菜花、法邊豆、小米飯、薯仔、甘筍等，好豐富，有口感之餘，亦令整體味道大大提升。