灑家粥麵 (Closed)

一早聽聞灑家既干炒牛河，雲吞麵好食，今日襯住起觀塘APM既關係，就嚟依度食個午餐。二個人叫左碗雲吞麵，干炒牛河，黄沙豬潤腸粉同埋蝦餃，夠曬豐富。首先上枱係干炒牛河，河粉炒得非常好，條條河粉分開唔會黏埋一團，碟底又唔會好似油浸咁油膩，實為高水準之作。雲吞麵既雲吞係細細粒散尾既類型，蝦同豬肉既比例啱啱好，麵質夠爽夠彈牙，湯底有大地魚既香味。豬潤腸粉皮夠薄，豬潤切得薄薄的，都好爽口好食。最後的蝦餃，蝦夠大隻而且新鮮爽口，蝦餃皮又夠薄，加少少豆板醬嚟食就好好食。