惠 (Closed)

食omakase就係想，感受日本師傅為你悉心安排嘅每一道菜，係呢一餐，平實得黎又能食出鮮味，值回票價😋😋先上針魚刺身配薑豉油，魚肉上可見到帶有銀光，肉質結實彈牙，味道較為清淡，爽身，兼配合埋薑豉油，少少提味，更帶出到針魚嘅青春活力，安排係前段作開始，非常適合！而陸續有來嘅刺身，相信食開嘅，都係見慣見熟嘅食材，穩陣派刺身。到食手握壽司環節，又去番清淡口味嘅上先，當日嘅真鯛壽司好鮮，師傅切得幾大塊，肉身白淨，啖啖肉口感，鮮甜味好突出。然後到偏重味嘅呑拿魚醬油漬壽司，入口先會嘗到醬油嘅鹹香，口感濕潤，肉質因為醃製過，而變得柔軟同濃味，可以話係第二次高潮。輪到食明太子白蝦壽司嗰陣時，都有七八成飽，呢件就係轉折位，又去番食白肉，明太子加粒粒蝦肉拌勻，comfort food 嘅感覺。總結呢次用餐體驗，整體係感受到師傅上菜嘅用心安排同處理食材嘅認真，餐廳氣氛平和，會推薦身邊嘅人黎食。