Wyndham Street Thai (Closed)

o 尋晚食得樂有個好幸福o 既姊妹生日，男友夾埋一大班好友響Thai 搞o 左個Suprise Party ，呢度環境同氣氛都唔錯，食具頗有特色，食物方面可算西、泰合碧，相當創新之餘亦見美味。值得推介o 既有生牛肉沙律，混入了不同醬汁及香料、碎果仁，酸酸甜甜，好好味。咖喱什菜及咖喱鴨肉亦非常美味，香濃咖喱汁略帶甜味，送飯一流，不吃辣的朋友亦可一試。黑咖喱牛肉是選用勁辣咖喱加上半生熟牛仔肉泡製而成，食得樂至鐘意就係D 生牛肉，正！最後當然唔少得甜品啦，一個甜品拼盤有芒果朱古力蛋糕、香橙椰子批、咖啡蛋糕，荔枝雪巴、椰子及香蕉雪糕等等，一大班人各有所好，淨係研究盤甜品都講o 左大半晚。享受過後接過賬單方知道原來大家食o 左一足可比美五星酒店價錢o 既晚飯，值唔值得真係見人見智，其實食得樂覺得最緊要都係食得「樂」！！