中環茶記 (Closed)

約左人去蘭桂芳飲野又未夠鐘，竟然喺威靈頓街搵到間中環茶記，無錯，間餐廳就係叫做中環茶記。間餐廳裝修到間冰室咁樣，乾淨企理，打卡一流，而且座位闊落，坐得都算幾舒服。一坐低就比佢牆上面幾款好特別既西多士吸引住，有牛油果流心、紫薯流心、芋泥流心，樣樣都勁想試，原本想叫紫薯流心試下，點知店員話我知今日紫薯好好賣，一早賣哂，下次真係要早啲去試下佢有幾好食。最後揀左鹹蛋流心西多士，都無失望到，內餡既起沙鹹蛋除左濃郁鹹香，仲唔算膩，食得出有少少奶香甜味。由於友人唔餓，所以淨係叫左個常餐沙嗲牛肉麵，配明治奄列多士，多士配料又係有好多選擇，友人最後揀左秋葵同磨菇。沙嗲牛麵一黎到己經聞到陣陣花生香，忍唔住試左佢一啖，絕對有誠意。個多士就更加有驚喜，平時最憎食多士塊包又乾又硬，咬到牙肉都損，但佢塊包勁軟熟，而且蛋炒得夠滑之餘又一啲都唔油，同啲配料好夾。我自己就叫左個海南雞+無骨豬手油飯，絕對係懶人首選，大大啖放哂入口骨都唔洗𦧲。一般海南雞飯都係配三款醬，除左雞要滑，三隻醬都係海南雞飯既重點，而佢地三款醬都一定係水準之上，食食下仲聽到隔離枱叫店員比多碟醬佢。而個無骨豬手既膠質就好豐富，配埋油飯成個組合好有口感