吞POT 雞煲火鍋.住家菜 (山林道) (Closed)

同Mr. R試完婚紗後，去食雞煲慶祝吓！呢間雞煲喺油尖旺都有唔少分店，我哋今次去嘅係山林道哩間分店～鋪頭有七款雞煲可以選擇。另外，除咗雞煲之外，仲可以選擇直接打邊爐，而打邊爐都有七款湯底選擇。我哋就梗係揀佢推薦嘅「滋潤螺片花膠雞煲」～果然冇令人失望，雞湯味濃（味道類似去酒樓食翅時嘅上湯）、花膠大大塊（入面有兩款花膠，一款膠質重啲，一款肉味濃啲），而且螺片同雞肉鮮甜嫩滑（唔係用返湯渣）。*溫馨提示（一）：雞煲嚟到嘅時候，可以試吓飲雞湯先！我同Mr. R飲咗最少4碗。值得讚嘅係，佢嘅雞湯可以無限任加～哩款花膠嘅膠質比較重。好味！另外，我哋仲叫咗「十全大寶丸」，可以食晒舖頭五款特色嘅手打丸，包括：手打生拆蟹粉墨魚丸、手打黑松露墨魚丸、手打黃金海膽黑墨丸、手打香煎鵝肝蝦丸、手打芝心牛丸。食過咁多款丸之後，Mr. R同我一致認同最難忘係「手打香煎鵝肝蝦丸」，香滑嘅鵝肝味係口腔久久不散，實在Yummy!**溫馨提示（二）：丸要趁熱食，特別係蟹粉墨魚丸，熱嘅時候佢入邊嘅汁先有爆醬嘅效果！另一方面，又要小心燙嘴！需要清水嘅話，要同待應講，佢就會拎俾你。