平昌 Premium (Closed)

佐敦莊士倫敦廣場有好多餐廳，而其中一間深得A姐喜愛嘅就係呢間平昌Premium！餐廳佔據一整層，枱同枱之間空間十足，坐得好舒服。同上次唔同，轉咗Menu之後，餐廳以唔同價錢水平分為食物種類選擇，我哋今日就揀咗世子御膳，同時已包埋大君御膳，有超過五十款嘢食，夠晒抵食。前菜類食韓國菜又點少得泡菜同各類嘅餐前小食呢？而喺平昌Premium，我哋就大力推介醬油蝦，夠晒入味，蝦身新鮮彈牙，好鮮甜。牛肉類回本選擇當然要有牛啦！T骨扒大大塊，燒出嚟好香肉味，A姐一個人都可以KO咗一塊！而最推介係鮮嫩多汁嘅牛前胸腹，接近入口即熔，輕輕燒幾吓就食得。仲有牛舌，肉質軟腍彈牙仲好有牛嘅香味，肉汁豐富濃厚！海鮮類另一回本推介當然係海鮮啦，海鮮嘅種類有蠔丶有蜆丶有蝦丶有帶子等，而我哋就最鍾意鰻魚！厚身嘅鰻魚唔多骨，燒到燶燶哋，夠脆口，而重點嘅鰻魚汁甜甜哋，好好味。豬肉類烤梅頭肉同烤調味豬肉醃得相當唔錯，半肥瘦，好juicy！熱食類等緊燒嘅時候，可以叫韓式飯卷、沙律、炸雞、煎餅、燉雞、粉麵飯都有！