古早味台灣原味 (Closed)

網上見呢間台灣嘢食評價幾好，今日經過銅鑼灣就上嚟試吓。早上去見到未有太多人住，靜靜地享受個午餐唔錯。一入到去侍應已經幾熱情叫我地隨便坐，餐牌都有好多唔同選擇，估唔到星期日都仲有午市套餐可以揀。個人鍾意食套餐，因為覺得抵食啲，所以冇叫散嗌嘢食。叫咗一個五味雞飯套餐同埋古早味牛三寶麵套餐，嘢飲就配左茉莉綠茶同埋炭燒烏龍茶。五味雞飯用嘅係雞脾肉，雞肉多而且骨少，食落可以啖啖肉，而且可以揀五款唔同味嘅醬嚟點，所以好似每一啖都唔同味道，感覺幾新鮮。雞肉肉質都好嫩滑，食落唔會好粗糙，而且仲陪左三碟伴碟小菜，有半粒炸花枝丸，小辣嘅青瓜同埋雲耳，食落開胃， $55係銅鑼灣呢個地段好抵食。仲叫咗個牛三寶麵，麵係粗麵，牛三寶包括牛肚，牛鍵，同埋牛筋，牛肚夠林，牛鍵有三大塊，每塊都好厚肉下，牛筋有兩大條，每條都好粗，唔硬但有煙韌嘅感覺，而且個湯都幾濃，未食一上菜已經聞到好香嘅牛味。麵嘅份量都多，一個人黎食份量絕對有突，伴碟小菜一樣。$75一碗份量多而且質素高嘅牛三寶麵，個人認為好滿足。好開心食左兩份幾好食嘅午餐最尾個價錢都唔太貴，冇收到+1，下次黎銅鑼灣會再食呢間。👍