漁屋日本料理 (荃新天地2) (Closed)

以前荃灣放題好出名食漁屋，事隔多年又來試一次，結論係價錢唔平，坐得唔舒服，好似小本經營員工好少，只適合荃灣人食下回憶。估唔到日式放題都有泰式生蝦，還可以。醬汁惹味，一客4隻，好爽口，配上蒜片同辣椒粒，齒頰留香。亦估唔到有蜜瓜巴馬火腿。蜜瓜清淡，火腿似979質素，只有咸味。雜錦刺身方面，絕大多數款式都好過其他放題！特別係紅蝦比較大隻。同埋拖羅真係拖羅，入口即溶，足料。三文魚肥美，唔似爭鮮淡水虹鱒。但可惜嘅係油甘魚比較令人不解，白肉同紅肉分開咁切 有點怪！輪到炸物方面，多春魚好好味，冇得彈！天婦羅蝦都好好味，但係蟹蓋似係阿信屋買返嚟嘅魚肉蟹蓋。串燒令我太失望，牛舌根本唔係牛舌，懷疑係豬舌充牛舌，細塊唔爽口，無牛味。至於鵝肝多士，我都預咗佢會用鴨肝㗎啦～但好在佢處理手法都算妥當成品幾好味。呢度嘅蜆同埋螺都偏大粒，冇沙，好鍾意食！羊架薄切，整得唔dry, not bad~最後甜品度，有哈根大師雪條其實幾吸引。焦糖燉蛋比較老，蒸過龍。