鳴門割烹料理 (Closed)

今日過黎九龍灣食呢間星期六日先會有半放題自助午餐既餐廳，限時90分鐘。揀左一款主食之後就可以任食刺身、壽司、小食、串燒、沙律，任飲日式特飲同汽水。主食揀左三色丼同西京燒銀鱈魚。三色丼有拖羅蓉、海膽、三文魚籽，份量都唔少，唔係飯多過餸，全部都幾鮮甜。西京燒銀鱈魚好嫩滑，份量岩岩好，始終要留肚丫嘛。刺身要晒三文魚、油甘魚、八爪魚、鯛魚、甜蝦，每人仲送一隻磯煮鮑魚。全部都幾新鮮甜美，唔會切到好薄，任食質素黎講好高質。壽司要左劍魚腩、帆立貝、加州卷，全部細細件，好貼心。小食叫左日式蒸蛋、吉列蠔、芝士年糕、芝麻雞翼、明太子玉子、枝豆、迷你牛肉湯鳥冬，除左三文魚鰭同面豉湯冇叫之外，哈。日式蒸蛋好滑；第一次食芝士年糕入面既芝士係流心架；明太玉子一定要encore，甜甜地又厚身，好好食。串燒叫晒雞軟骨、免治雞肉棒、冬菇、厚燒牛舌。厚燒牛舌又係encore之選，好腍；冬菇都唔錯。沙律叫左胡麻豆腐沙律、角切魚生沙律，新鮮爽口。飲品飲左白桃乳酸特飲、巨峰乳酸特飲、橙汁，我就鍾意白桃乳酸特飲多啲。