無老鍋

Open Now

Now Closed

無得去旅行幾年，總會特別掛住係外國先食到既美食。無老鍋真係每次去台灣既必食之選，係香港開分店固然正，想預約都唔容易，假日既晏晝嚟食，人流唔算多。店內仲有醬料自助區，無老特調醬油幾開胃，可以一試。仲有蒜泥水、白醋、香油、辣椒、香蔥等，白飯任裝。冰淇淋豆腐鍋湯底真係打邊爐既精粹，充滿鮮味又帶點藥膳果種回甘，加其他食材前先要飲番啖靚湯。吸收左湯汁既冰淇淋豆腐豆味好香。麵包豆腐同鴨血仲可以任添。上選牛小排比想像中大碟好多，脂肪分布平均，牛味好濃郁，未至於入口即溶但都值得一試。綜合丸分別有豬骨濃汁貢丸、牛骨濃汁牛丸、手工蝦丸同埋手工花枝丸。味道好濃亦相當彈牙。綜合餃分別有燕餃、蛋餃及魚皮餃。餃子皮晶瑩剔透，相當掛汁。鮮甜蔬菜盤一上碟，店員好好咁放左啲粟米落去個鍋度煮。看似普通既蔬菜，整體食落都好鮮甜。水蜜桃沙冰食到滯滯地又飽飽地既時候，店員會送上細細杯既水蜜桃沙冰。呢一小杯清甜冰爽既沙冰真係不得了，消滯得嚟又開胃，飲完之後又可以繼續大吃大喝！仲可以免費添加。埋單每人接近$500，但唔洗專登飛轉台灣，又可以試到台灣既味道，有機會的話會再嚟幫襯！