御品·千之味 (深水埗) (Closed)

今日好好運發掘到一間深水埗區嘅日式小店，原先諗住去連鎖壽司店食，但見到等位嘅人龍就放棄咗，誤打誤撞就嚟到呢間店。一入店畀我嘅感覺就係好專業，事關店員一開波就講解店入面有兩款豉油：白色樽係for刺身嘅，而黑色係for壽司飯嘅，相當講究。友人同我都唔算太餓，所以都放棄咗叫set (雖然好抵)，我哋叫咗御品·壽司拼盤 $178 有成15件，齊哂我鍾意食嘅魚生，有左口魚、帶子、鯛魚、海膽等等，價錢相宜，但質素一啲都唔馬虎，新鮮好味！最見真章嘅吞拿魚同海膽都係高質嘅，應該都無咩係唔好食㗎喇～另外叫咗個照燒雞扒湯烏冬 $78，雞扒燒得好出色，外皮微焦，賣相超吸引，肉質嫩滑💕 湯底清清哋，配上焦香嘅雞扒，味道剛剛好，唔會太濃味，亦唔會單調，係簡簡單單嘅美味😝臨埋單，店員送上甜品，係雪米糍～ 非常貼心嘅係，佢唔係雪到硬一硬嘅，而係已經半解凍～如果你鍾意睇我嘅食評，不妨關注我，支持吓我，謝謝你☺️💕