僕之拉麺 (Closed)

平日中午12點幾竟然一個客都無，鼓起勇氣入咗去，點知⋯無伏！仲喜出望外！一入到去，連店員都唔見，正當諗住大叫之際，廚房入面嘅師傅就請我坐低，原來當時全店得佢負責煮麵同招呼客人，最後收錢都係佢😅我唔知平時係咪咁，可能當時得我一位客人，完全不感到招呼唔好，反而小店嘅vibe仲出。師傅見我揀左兩倍叉燒拉麵，就主動同我講轉叫佢地特價午餐加叉燒會平啲，我見只係少左半隻蛋，就跟佢建議。我見之前大部分食評都係推介佢嘅濃厚豬骨湯，但原來有得揀豬骨清湯，有鹽味同醬油味，即係總共有三款湯底揀由於尋晚食完辣野個肚唔太舒服，所以我就叫左鹽味清湯。上枱好靚仔，首先個碗好靚，啲配料又放得整齊，個湯又真係清！首先講左唯二要挑剔：蛋黃輕輕熟左啲，啲麵條比較普通，食到尾淋左啲，但又勝在完全無梘水味其他方面，所有野都恰到好處，個湯雖然清，但飲到甘甜味，第一啖絕對有去左日本嘅感覺，叉燒雖然薄切，但彈牙又有肉香，筍爽口無異味，海帶就加左份爽脆口感，但唔會搶味。總括來說，係香港算係一碗高質的拉麵。難怪發現佢牆上面原來貼左係2020年嘅開飯熱店，但就奇怪點解而家會咁冷清，希望只係時段問題，可能假期會多人都未定。