Ricco (Closed)

去完附近李鄭屋漢墓作常識科參觀，一條東京街之隔，轉入青山道x誠超市幾個舖位就到。啱啱撞正換招牌。聽講餐廳停工一排，今日開番。位置不算隔涉難搵，裝修新淨四正。大部分預設二人枱，近舖尾廁所一排枱面壁。快餐模式，先點餐付款，等叫號再自行拎餐。試咗溫泉蛋系列-「招牌生炸雞髀飯」，日式照燒擺咗喺脆肉瓜蘿蔔底，就算篤穿溫泉蛋撈埋，喜歡汁浸飯始終稍嫌汁唔夠多。不過重點炸雞髀真係超鬆脆，加上已經少見呢類以麵包糠式炸髀，幾令人食指大動。餐單應該加番條🌶俾「韓式泡菜肥牛炒意粉」，已算小辣，雖然配菜都係脆肉瓜菇菌，炒得有少少汁唔會太濕。兩個餐份量都係標準夠哂每人食，所以點多個「芝士肉醬焗薯蓉」（雖然都幾好樣）有啲過咗，而且薯蓉都唔細，幾乎等於食多份意粉。