留白居酒屋 (Closed)

又到了景峰呢邊搵食，見有間幾型嘅日本野喎，午餐七十至八十左右都ok吖，試下先。小店留白居酒屋，舖面係咪幾型先？！小店真係小店，店內十個位左右，bar枱模式。叫左份午餐，有玄米茶，沙律，同麵豉湯。沙律菜爽脆，多麻醬正呀。麵豉湯熱辣辣，有啲雜菇幾香菌味。午餐點了呢個吉列豬扒丼，賣相幾靚。Top shot睇落好細碗咁，其實唔係㗎，有一大塊豬扒，飯都唔少。除左豬扒，仲有紫菜絲同青蔥點綴，當然唔少得吉豬嘅醬汁啦，酸酸甜甜，有左個醬啲吉列豬扒好食好多。講番塊豬，外層炸得香脆，內裏仲好有肉汁唔會乾爭爭，有著少少豬油流出，十分甘香，再配埋個軟綿綿嘅日本米飯，好滿足呢。午餐無加一，都ok吖唔算貴，可能附近都係較相宜嘅食店，相比起黎留白午市好靜，計埋自己都係得兩枱客，唔唔～多多支持下小店啦。