鮨池壽司店 (Closed)

早兩日約個好友係大埔食晚飯聚舊，佢介紹去係八號花園附近嘅日式餐廳食兩人套餐。餐廳環境都幾寬敞舒服，以日式裝修為主題。我地點左一份鮨池二人前套餐，依份二人套餐係全日都會供應，當初都有少少擔心唔夠飽，但慢慢依落去就打消依個諗法。先來前菜香芒蟹籽沙律，芒果肉夠鮮甜，蟹籽份量相當十足，令爽口嘅青瓜絲增加口感。再來刺身拼盤裡面有生蠔、鮑魚、三文魚，油甘魚、赤蝦、帆立貝和八爪魚，件件新鮮，個人最愛係赤蝦和帆立貝，肉質相當肥美。火炙芝士三文魚卷有我最愛嘅火炙三文魚，經微微炙過三文魚，入口帶出啖啖魚油香。串燒有燒雞翼和牛舌，牛舌比我想像中有驚喜，燒得剛剛好，嫰滑多汁，值得一讚。雜錦天婦羅（二人）裡面有2隻大蝦、茄子、秋葵、蕃茄和南瓜，入口酥脆，沾上天婦羅汁，更為滋味。魚奶湯奶白色嘅魚奶湯，入口夠鮮甜，裡面配上少量菇和菜，減減油膩感。櫻花蝦雞肉炒飯份量都幾多，炒飯用上珍珠米，重點係炒得夠乾身，炒飯吸盡櫻花蝦和雞肉嘅精華，停不了口。我地另外點左兩杯飲品，日本完熟桃味梳打及日本富士山柚子梳打，爽。最後甜品係阿波羅雪條，係朱古力脆皮雪條，正。