蛋哥 (Closed)

去蛋哥幫襯嗰日，本來最期望食嘅係蛋，點知印象最深刻嘅，反而係沙嗲牛麵。叫咗個常餐，有特濃沙爹牛肉公仔麵（我加咗錢轉出前一丁），嫩滑炒蛋同埋奶油豬（呢個都係加咗錢，本來係牛油多士）。叫得特濃，個沙嗲醬果然好高質，香濃惹味，微甜微辣唔太鹹，完全係我最鍾意嘅味道😍，由於個醬係另外淋上去，所以店員會提醒撈勻先好食，不過因為我轉咗出前一丁，本身個麵已經好夠味，所以食嘅時候，將每塊牛肉沾滿大大 pat 沙嗲醬然後啪入口，感覺超正🤤。至於點題食物炒蛋其實都唔錯，嫩滑之餘，有蛋汁亦有蛋香，放上奶油豬一齊食，好滿足😌。呢個常餐係茶餐廳嘅價錢，但係小店環境同衛生都比茶記好好多，應該會再嚟幫襯。