Nomad Burger (德民大廈) (Closed)

Burger 從來唔會係我諗食嘢時既首選，加上係宅在家叫外賣會好影響漢堡層層分明、薯條既香脆感，更加唔敢抱太大期望。但凡事總有意外驚喜，當中今次以明太子薯條勁推必試。慢煮手撕豬雙層漢堡 $99手撕豬有單層/雙層/三層選擇，稱用上慢煮方法，果然咬落每絲肉既肉質軟嫩鮮味Juicy，唔想食太濃味既建議選擇呢款。麻辣軟殼多蝦餅漢堡 $178（套餐連薯條、汽水）大大隻軟殼蟹炸得酥脆、蝦餅夠彈牙、配上微微麻辣既蛋黃醬，配搭惹味，係香口濃味既好選擇。炸魚芝士他他漢堡 $118 （套餐連薯條、汽水）經典配搭炸魚+他他醬，微酸既味道中和左炸物+芝士既油膩。炸魚外層外賣黎到都同樣保持到脆口。明太子薯條 （套餐加錢$15）超驚喜既醬汁，睇相都見到醬汁佈滿左超多既明太子粒粒。粗大條薯條炸得香脆，沾上呢個醬汁咸鮮味十足，啖啖爆籽享受。平常唔太好薯條都忍唔住因為呢個醬一口接一口食。三重松露薯條 （套餐加錢$15）用上松露醬、白松露油、松露粉等做成既松露醬味同樣做得出色，薯條亦灑上松露粉，惹味十足，打開盒味道就撲鼻而來。