616虎喰燒肉‧酒場 (Closed)

今次去咗將軍澳食燒肉，餐廳係屬於616集團旗下，616出名食潮汕牛肉火鍋，原來而家連燒肉都有得食。餐廳裝潢以傳統日系佈置，還有落地玻璃窗，空間感十足。餐廳設有三款燒肉套餐，分別有$268、$368同$468，今次就揀咗中價位試試。雅-嚴選yakiniku御宴(2人前）三格前菜前菜分別有冰話梅小番茄、韓式泡菜和牛蒡醬油漬，可以先清清味蕾。蟹籽沙律沙律有蟹籽、蟹柳同青瓜絲，份量十足。野菌蟹肉茶碗蒸一打開蓋已經見到滿滿蟹肉，雞蛋入口順滑，蛋味香濃，再加上野菌香氣，味道層次豐富。海鮮有扇貝同牛油虎蝦，扇貝夠曬大隻，入口鮮甜，牛油味濃郁，虎蝦爽口彈牙，再蘸上蒜蓉牛油，十分滋味。燒肉有黑毛和牛肉眼上蓋、澳洲和牛牛肋條、澳洲和牛牛腹肉、極上封閂柳、牛肋肉、牛舌心同鹿兒島黑豚五花肉，攞盤十分精緻。黑毛和牛肉眼上蓋油花密布嘅霜降肉質，肉味濃郁，入口油脂感重，牛舌入口爽彈。伴碟有紅椒、黃椒、冬菇、雞髀菇同翠玉瓜，可以中和油膩感。溫泉玉子丼整碗滿滿紫菜，拌勻溫泉蛋一齊食，十分美味。