桜

Open Now

Now Closed

黎到元朗又新街，一向都有好多好野食，中意周圍搵好野食嘅我，今次搵到呢間櫻手卷。鋪頭門口有好多手卷嘅相，俾佢吸引左入下~手卷嘅種類好多，就咁睇都有4、50種，價錢由十幾開始～由普通嘅手卷到高級嘅馬糞海膽，帆立貝同火灸等等都有。今次就叫左個帶子拼海膽手卷，落完單之後就見到入面師傅即刻開始整喇！ 好快就有得食，啲海膽多到差啲跌出黎！配埋新鮮嘅帶子好滿足！岩岩整好啲紫菜仲好脆添。鋪頭有兩張枱可以俾人食野，上面有唔同嘅豉油同wasabi，有勁辣岩哂食得辣嘅我啦~除左手卷之外，都有唔同嘅剌身售賣，最受歡迎當然就係三文魚剌身啦，可以買幾塊又可以買半磅一磅咁，另外仲有成板海膽添！有加拿大海膽同紫海膽，價錢都幾抵，得閒可以買外賣番去享受下。仲有其他小食同幾種丼飯，叫左個鰻魚丼，比想像中大碗，啲鰻魚仲好大塊添！鰻魚應該有燒過，令味道更加突出。加埋啲蛋絲同甜甜嘅鰻魚汁配飯真係好好食。估唔到呢間小小手卷店嘅質素咁好，下次再試下其他唔同嘅手卷先！