蓬萊咖哩屋

Open Now

Now Closed

餐廳提供不同人數嘅預設套餐，我就揀咗二人餐（$318+10%）。餐前送咗兩片脆片，青色醬十分清爽，醃紅蘿蔔、醃洋蔥酸酸哋好開胃。餐湯（雞肉忌廉湯，濃度適中，味道不錯）、咖哩角（熱辣辣，外面鬆脆，裡面咖哩薯蓉香味重）各要咗一份。羊肉咖哩，要咗微辣，咖哩香味重，而且有蕃茄底，甜甜辣辣，多重口感；羊肉大約有五/六件，有羊騷味但唔重，肉炆得好淋，而且唔肥，好食。蒜蓉燒餅，熱辣辣（辣手），蒜味唔太重，點咖哩一齊食冇得輸。串烤五香雞件，即叫即做，鐵板上，雞件外面香口、內裡有肉汁，醬料醃味好惹味；連埋鐵板底嘅洋蔥、椰菜絲、紅蘿蔔絲都勁入味，正。清炒時菜，用咗不少香料炒，好惹味。印度黃飯，米粒長，乾身，撈咖哩啱哂。餐飲要咗2杯啤酒，跑完啤一啤，爽爆。呢餐食得超滿足，食物質素又好，價錢又合理，絕對值得推薦。