相馬日式火鍋 (Closed)

今日同朋友嚟到荃灣頂層嘅呢一間相馬，朋友話呢間野平靚正，一於嚟試吓啦。日式放題，我哋選擇咗第二級嘅牛肉，價錢唔算特別平，但係價錢都差唔多係呢啲價。至於湯底方面，佢嘅選擇都比較多，但係我哋始終係選擇咗日式嘅甜豉油，同埋蕃茄湯底。佢哋嘅牛肉，雞肉，豬肉，都係任食嘅，但係我就最欣賞係佢嘅牛肉，真係超超超超超級好食呀，切得唔算好簿身，但係牛味超重，一啲都唔鞋口，一上枱鮮紅色，肥瘦均勻，入口柔軟又滑，以放題嘅質素，呢啲牛肉真係算高質啦。雞肉方面，大大件，而且好滑身，又唔會有骨，果然真係啖啖肉啊。豚肉，唔會好薄，又唔會太肥，入口爽滑，質素果然唔錯。至於菜類，選擇唔算好多，但係質素就一啲都唔差。菜果方面竟然有我最鍾意食嘅羽衣甘藍，真係唔係間間放題都可以搵到，人哋話羽衣甘藍最適合女人食嫁。當我地以為就快食完嘅時候，發現竟然仲可以有炸物，同埋有燒物食，我哋選擇咗炸蝦，蝦唔算好大隻，但係勝在新鮮炸起，又唔會好厚粉，脆卜卜，都不失為一個選擇炸物方面我選擇咗金菇肥牛卷，牛肉嘅質素依然係咁靚，燒到好香，金菇吸收左牛肉嘅精華，分外美味。