聚鳥亭

Open Now

Now Closed

今日預約咗一間樓上舖，食日式火鍋晚餐，呢度有好多款日式火煱唔同味道嘅湯底可以選擇，今日兩個人食，我哋揀咗「柴魚昆布清湯」，湯底味道好清新，有柴魚嘅鮮味，再加上昆布嘅味道，感覺唔會燥熱，係一款比較健康嘅火鍋。食材方面，因為得兩個人，所以揀咗幾款配料試一試，其中一款「M4澳洲和牛牛頸脊」好值得推介，牛肉充滿牛嘅鮮味，而且好香、好滑，冇牙都食得到。另外仲有「手打牛丸」，牛丸調味得相當適合，唔會蓋過牛肉嘅鮮味，牛丸入面充滿肉汁，好好味，下次嚟一定要encore。另外仲有「手打墨魚滑」，墨魚滑入面係有一粒粒爽口嘅墨魚粒，感覺好特別，好好味。呢度嘅食材，唔會太大碟，好適合人少少嚟食火鍋，唔怕食唔晒，又可以揀多幾款唔同口味，情侶拍拖嚟食，都非常適合。環境氣氛亦都相當好，裝修充滿日式風味，天花板掛咗好多彩色燈罩，好特別，又好舒服。店入面座位唔多，靜靜地，好適合一班朋友聚會，傾吓偈，舒舒服服咁慢慢食，而且食物質素好高，價錢相對合理。