粵 (Closed)

想食點心，又想坐得舒服，搵搵下見到呢間得獎酒店餐廳，又近港鐵站，啱哂。見到點心紙，唔洗諗就揀咗個得獎推介嘅亮點，有筍尖鮮蝦餃皇＋海皇芝心芋角＋奶皇金雞酥。毎賣相超吸引。小小嘅點心籠裝住一隻蝦餃，仲用咗甘筍片墊底，代替常見嘅牛油紙。芋角雖然比一般見嘅細隻，但少咗嘅只係芋蓉部份，食落就更突顥到芝心餡，仲有用芋頭絲編織成嘅小籃子裝住，好別緻。最得意嘅最後先食，估佢唔到，底層嘅係馬仔，而杯狀嘅竟然係白朱力，好特別！而佢嘅奶皇餡亦貴精不貴多，差不多融入咗個酥皮，唔會太甜。只係要留意金雞上嘅雞冠等裝飾係用糖霜做嘅，有點硬。生煎包同野菌包就試過唔少，生煎野菌包就第一次試，賣相同生煎包好似。食落唔會好油，餡都好足，好味！雞札係比轉傳統同普通嘅點心，呢度都有，但就加咗淮山，鮮淮山四寶雞札。腐皮包住雞肉，淮山取代咗一般酒樓用嘅芋頭，豬皮亦被魚肚取代，整體嚟講即刻清新咗，健康咗。好似好普通嘅點心即刻變得特別好味。