聚福樓 (Closed)

放工約咗舊同事入屯門食飯，今次呢間都算隱世小店，位置唔係喺屯門市中心嗰邊，而要喺屯門西鐵站再轉接駁巴士再入去...不過都係幾個站就到...我地一早book咗枱，所以一去到就有位，眼見有唔少人都碰門釘，因為店舖嘅位唔多，所以預約會比較好啲！我地兩個女仔食量唔多，只係點咗一份豬，一份牛，再加個沙律，佢啲名改得好特別㗎！叫小豬仔好慢好慢咁打排球同紐西蘭媽媽慢慢煮肉眼！幾有心思！喺等上菜同時，發現原來有個self service位，唔錯！冇幾耐個沙律同主菜都嚟咗，三碟份量都好多，個牛扒好淋身，我叫咗七成熟，唔會太熟而好un....最值得欣賞嘅就係佢喺牛扒上有個香草牛油，可以慢慢溶落個塊牛扒度，另外個豬仔骨應該慢煮關係，好淋身，好易切，而且係咁大塊都好入味，值得一讚！而且有大量sweet potato chips 伴碟，食到好飽！總括嚟講，呢間店舖雖然唔係市中心，但相對價錢較便宜，而且睇得出用心製作，所以，有機會會再嚟食多次！