樓下冰室 (Closed)

依間樓下冰室之前都經過好多次，一直都想搵機會食下，今日終於同朋友去到食。入面環境唔錯，幾乾淨，裝飾有懷舊嘅感覺，座位都算闊落，唔會人迫人。餐牌既選擇都幾多，花多眼亂。不過聽講佢地出名瑞士雞翼同番茄濃湯通粉。於是，我地就叫左2個主食，2個小食，再加2杯飲品。依個番茄濃湯通粉配牛乳炒蛋 + 麻辣脆雞粒，份量好足，通粉唔會太硬/太淋，軟硬適中，番茄湯味濃，唔似就咁用番茄膏加水，炒蛋亦好香蛋味，麻辣脆雞粒唔會太辣，但好惹味。依個炒意粉幾乾身，但又唔係乾爭爭果隻，料足，味道亦岩岩好。佢地既招牌瑞士雞翼，瑞士汁好好味，少少甜甜地，好入味。炸餃唔會炸到成隻乾爭爭，外脆內軟，餡料足，隻隻都脹卜卜。華田脆脆唔會過甜，脆脆好好食。食左咁多野，埋單$200都唔洗，不過份量比想像中大份，真係飽到捧住個肚走。