洋食商店 (喜遇)

Open Now

Now Closed

朋友知我鍾意食日式居酒屋，所以帶咗我嚟呢間喺長沙灣幾高人氣嘅西日居酒屋，餐廳門口擺設同內裏裝修都非常富有日本色彩。餐廳主打壽喜燒套餐，如果唔鍾意食壽喜燒，另外都會有單點食物，而且種類都幾多。我哋揀嘅套餐有岩手縣和牛、美國牛頸脊同鹿兒島茶美豚三款肉，三款肉煮好後再配埋蛋汁，口感細膩柔滑，肉汁飽滿新鮮，而且職員全程幫你煮埋，自己安心等食就可以，服務非常好。之後再喺鍋加入壽喜燒汁煮蔬菜，蔬菜吸收咗肉汁同壽喜燒汁，食落更加清甜。到左最後會為你加入燉飯，等個飯收水就可以食得，米飯粒粒都沾滿咗醬汁，而且帶有陣陣黑松露味，味道甜甜地幾得意。串燒拼盤足足有六款食物，自己最鍾意食燒腩片，肉味濃郁油香滿溢，其次就係海蝦同雞翼，兩者都非常入味。套餐可以喺十幾款小食當中揀兩款，我哋揀咗玉子燒同和牛可樂波配黑松露醬，玉子燒加上沙律醬炙燒後再加埋蟹籽，食落脆卜卜又軟嫩，口感層次豐富，而可樂波用薯仔、洋蔥同牛肉混合整成，口感外脆內軟，味道咸咸地。估唔到開心果草莓芭菲咁吸晴，除咗有兩個雪球，仲有蝴蝶酥、泡芙、果仁粒等配料，層次非常豐富，真係睇得又食得，呢個甜品必點。