Plato Cafe & Bistro (吳松街)

難得約朋友出嚟聚吓舊，決定揀間好啲嘅餐廳，見網上評語都唔錯就揀咗呢間，係一間性價比好高嘅西餐廳！我哋揀咗個二人餐（$546），有西班牙風乾火腿伴哈密瓜沙律、炭燒澳洲肉眼牛扒同埋西班牙黑毛豬鞍。今日嘅餐湯係南瓜湯，飲落好滑好香濃，而且冇南瓜絲，我自己幾鍾意。而前菜嘅風乾火腿伴蜜瓜沙律，鹹鹹地嘅火腿配埋清甜嘅哈密瓜，非常開胃，哈密瓜食得出係好新鮮嘅，好爽口好甜，同火腿好夾。我哋嗌咗七成熟嘅牛扒，淨係見到賣相已經覺得好吸引，牛扒嘅熟度啱啱好，仍然可以見到中間嘅肉係鮮紅色嘅，咬落好軟熟，肉汁都鎖晒喺牛扒入面，啖啖都爆汁！而黑毛豬鞍同樣出色，有成差唔多兩寸厚，超級抵食！肉汁都係鎖住晒喺豬扒入面，淨係切塊豬扒啲汁都爆晒出嚟，口感軟熟爆汁，十分回味！兩碟扒都配有一個焗薯同埋沙律菜，一定唔驚食唔飽！另外我哋都嗌咗杯特濃朱古力同埋焦糖朱古力，兩杯朱古力味都好濃，飲完淡淡朱古力味仍然停留喺口入面。最後甜品可以揀芝士餅同埋Movenpick朱古力雪糕。呢個價可以食到呢個質素嘅西餐，絕對係好抵食，性價比之選！