Bella Shine (Closed)

同男朋友想係觀塘搵扒食，無意中係OpenRice搵到上年食過既Bella Shine, 上到黎再無意中發現原來有任食牛扒豬扒，極好扒類既男朋友諗都唔諗就order放題。雖然係任食，但頭盤都唔馬虎，絕對驚喜。首先上枱既有蒜蓉包同餐湯，印象中每次上黎既餐湯都唔同，今晚既就係紫薯湯，曾經亦都飲過蕃茄湯同甘荀湯。再黎就係我十分鐘意既頭盤牛油焗龍蝦、鵝肝凍批多士同黑醋沙律，估唔到任食扒都有咁令人精神既前菜。等左陣牛扒同豬扒終於上枱，真心唔係細細份咁比你，嚿扒真係同其他地方散叫一樣咁大塊。牛扒牛味濃；豬扒有驚喜，竟然超級嫩滑。侍應見到我哋食晒，收碟個時會主動問你加唔加，而且就算encore上枱都算快，不過第二碟之後扒就比較細件，想飽肚啲沙律薯條湯都可以任加。最後上埋任食餐既甜品成餐都滿意，認真侍應態度好又主動，仲好快手。美中不足一定係未開始叫野食之前，有位著便服而又應該係餐廳職員既女士，無戴口罩周圍行，間中又會去擺下位同啲員工討論下野，疫情之下見到咁，個下真心想離開餐廳。但好彩對方好快就走左，希望餐廳能夠注意。