辰 (Closed)

Omakase 夜晚食點都貴啲，慶祝周年紀念我老公搵咗呢間新開業冇耐好耐仲有得食 Lunch ，佢忙裏偷閑陪我嘆咗個好豐富嘅lunch 。餐廳環境好大好靚，見到座位唔多，所以坐得好舒服，店員推介一個唔貴嘅價錢可以任飲清酒梅酒，見到有自家製梅酒，老公話慶祝周年紀念，點都要飲返幾杯杯，味道酸酸甜甜，酒精濃度唔高，好啱晏晝飲，而且真係好味喎。廚師發辦都係用最好嘅食材，有前菜螢光魷魚，茶碗蒸，龍蝦刺身，幾款剛由日本空運到港嘅刺身，全部都好鮮甜，好肥美，最開心係呢度夠正宗，師傅上一道菜都會介紹食物嘅來源，最特別呢碟燒馬友，平時我哋食嘅馬友魚，都係蒸，原來用日式方法燒嚟食係咁好味。Sushi係今次嘅主菜，未食之前師傅提醒我抺手，可以嘗試吓用手食壽司，每款壽司都好新鮮，而且飯本身有味道，壽司飯本身暖暖哋，刺身非常新鮮再點少少豉油，我第一次用手喺香港食壽司，壽司嘅溫度同埋味道，令我覺得好似身處日本一樣，最後食埋碗用新鮮魚熬製嘅魚湯，味道極級濃郁，兩小時嘅午餐，實在非常滿足。