御名園 (Closed)

將軍澳天晉有間中菜，今晚終於同屋企人嚟咗試下。環境唔錯，一家人嚟就啱晒。食飯選擇都好多燉湯都好吸引喎。聖子（$42/隻）- 呢個金蒜銀絲蒸嘅聖子真係好惹味，蒜香好濃郁，啲粉絲索晒啲蒜味好入味。而聖子都好鮮甜彈牙，一啲過韌嘅感覺都無。金滔海皇西施泡飯（$118）- 食咗咁多海鮮，點都要食番啲主食先夠飽嘛。呢個泡飯份量十足，四至五個人食都得。個湯都好足料，最鐘意落埋脆米脆卜卜咁夠香口，可惜我覺得個湯底鹹咗少少。桃膠西施杏仁茶（$28）- 最後食返個糖水先夠完美。呢個杏仁茶嘅杏仁味好香，又唔算甜。仲有好多蛋白同桃膠，食完都覺得美顏。