嵐橋日本料理

Open Now

Now Closed

今晚喺尖沙咀行街，諗起朋友話尖沙咀棉登徑有間唔錯食日本野嘅餐廳，所以決定去試吓。門口裝修得好靚，好有日本風味。原來餐廳有3層，店員帶咗我地坐吧枱，喺吧枱嘅魚生雪櫃，見到d刺身勁新鮮，睇住師傅即整壽司刺身，另有一番風味。三文魚腩，黑鯥，拖羅刺身，3款刺身都好肥美，仲要勁厚切，黑鯥刺身，師傅將d皮燒一燒，令到d魚皮非常香口，三文魚腩＆拖羅食落口d魚油爆出黎，超肥美。金目鯛壽司，真鯛壽司，2款壽司嘅壽司飯d色係啡啡地，係有味飯，唔同普通壽司醋飯，金目鯛＆真鯛食落爽口，好鮮，唔錯。串燒厚牛舌，因為厚切關係，食落好有口感，仲好爽口。燒薩摩赤雞腿肉，勁多千島醬喺雞腿肉上面一齊燒，好惹味，雞肉都仲好嫩滑。燒薩摩赤雞腎，切到細細好易入口，上面加咗7味粉，辣辣地，加上非常爽口嘅雞腎，好夾。煎沖繩豚肉餃子，餃子煎到好甘香，脆卜卜，餃子入面d肉都好juice,配埋有少少辣辣地嘅餃子汁，好好食。鯛魚湯鍋燒烏東，d魚肉份量都幾多，魚肉好滑，好鮮味，個烏東湯底係奶白色，係用魚煲成，個湯好重魚味，加上吸味嘅烏東，食落條條烏東都有魚味，勁好食。