The Socialhouse (Renamed) View

朋友話大坑附近多嘢食，所以專登過去行吓，咁啱見到呢一間西餐裝修好外國咁好舒服，再望吓平時啲食評好似都唔錯，所以就入嚟試吓。坐低冇幾耐就上咗個麵包，熱辣辣好重香草味，加埋啲橄欖油同醋好好食。跟住就到無花果沙律，啲菜好新鮮果仁又好脆口，仲有好多新鮮無花果，平時都係食開無花果乾，原來新鮮無花果都好鮮甜，配埋果仁同啲菜，非常夾。之後就到主菜，西班牙乳豬仔，同其他食評講嘅一樣，乳豬皮又薄又脆，超香口，同平時食開嘅中式乳豬好唔同，一啲都唔肥膩。同埋叫咗呢個乳豬仔有個promotion，叫黑啤可以買一送一，個黑啤好綿滑，好易入口，配乳豬仔食一流。另外一個main course 就叫咗紐西蘭羊膝，炆得好腍，好香羊肉味，如果冬天再凍啲食就perfect，本身想叫個甜品，不過食完兩個肉好都夠飽，但見到隔離枱生日有個拿破崙好靚，唯有留返下次再過嚟食。