燚 (Renamed) View

最近公司加人工，所以晏晝同事就帶我嚟咗呢間隱世鐵板燒食午餐，平時經過門口真係唔知呢間係鐵板燒餐廳，因為門口都幾神秘。餐廳面積唔算好大，只有兩張枱同吧枱，今次朋友負責發板 😌 自己就負責食。食物未嚟之前就叫杯啤酒 Chill 吓，炎炎夏日飲番杯透心涼嘅麒麟啤當堂舒服晒。煙三文魚包住沙律菜，伴碟仲有味道酸酸嘅果醋泡泡，清新健康又醒胃。咸香味十足嘅巴馬火腿配上乳酪同菠蘿醬，呢個配搭相當新穎，味道層次相當豐富，估唔到都幾夾。大蝦煎嘅火喉控制得非常好，入口肉質嫩滑彈牙。超鍾意食鵝肝嘅我，見到呢件鵝肝真係頂唔順 🤤 勁厚切又大件，廚師特意係濃郁嘅鵝肝下面加上菠蘿醬，中和鵝肝帶嚟嘅油膩感。牛柳同豬扒同朋友share一齊食，澳洲牛柳揀咗五成熟，牛柳肉質粉嫩多汁，牛味相當濃郁。日本宮崎豬扒相當有驚喜，估唔到肉淋而不韌，旁邊仲提供兩款醬，食多幾件都唔覺滯，牛柳同豬扒伴碟嘅蒜片炸得超香口超好味。最後食埋熱辣辣嘅炒飯非常滿足又飽肚。