CIAK - All Day Italian (太古城中心) (Closed)

今日嚟到位於太古城嘅米芝蓮意大利餐廳CIAK晚餐，首先店內裝修極具格調，座位非常寬闊，坐得都幾舒服.不過可以睇到呢間餐廳都幾多捧場客，推薦大家要去食之前Book咗枱先。首先前菜方面我哋叫咗二式燴八爪魚仔，佢哋特製嘅醬汁有濃濃嘅蕃茄味，但唔會太酸，同新鮮嘅八爪魚仔非常搭配，而且非常開胃。之後意大利菜就梗係要試吓Pizza啦，我哋選擇咗佢哋嘅風乾火腿芝士pizza，佢哋嘅風乾火腿有香濃嘅鹹香味但唔會太鹹，啱啱好，Pizza芝士味濃郁，搭配火腿出奇地夾。之後當然唔少得意粉，我哋叫咗兩款意粉，第一款係蛋黃芝士汁配風乾煙肉粒意粉，佢嘅蛋黃芝士汁芝士味香濃，而且佢嘅蛋黃汁零意粉食起上嚟更加香滑，搭配香口嘅風乾煙肉粒，好好食。另一個意粉我哋叫咗燴鴨肉牛肝菌三角扁意粉，呢個意粉非常特別，三角形的，而且口感非常之獨特，個人非常之鍾意，意粉有香濃嘅鴨香味，同時佢哋嘅牛肝菌汁同鴨肉非常之搭配，獨特得來十分出色嘅一個意粉。整體方面每一道菜都非常之出色，不愧係米芝蓮廳，喜歡意大利菜嘅朋友一定要黎哩度試吓.