海膽仔

Open Now

Now Closed

香港人最鍾意食日本嘢，當然我都唔例外。今日離開新蒲崗，見到有間日本餐廳叫海膽仔，就諗起好耐已經冇食過海膽，於是就行咗入去。舖頭嘅裝修都好靚，而且面積都好大。其實佢雖然個名叫做海膽仔，但係其實唔止海膽，仲有好多唔同嘅菜式。我同朋友一人嗌咗一個丼飯，我就叫咗個三色海鮮丼，係有三文魚子、海膽、同吞拿魚蓉。佢嘅份量絕對唔細，而且海膽都好新鮮，食到佢嘅鮮味，再加上三文魚子嘅份量都好多，每一啖都能夠食到配菜。而我朋友就嗌咗一個雙重三文魚丼飯，三文魚都好新鮮，而且佢嘅丼飯唔會過酸或者冇味。除此之外，我哋仲嗌咗個油甘魚刺身，都係非常新鮮，而且好厚切。除咗刺身類之外，我哋仲嗌咗好多小食，分別係炸蠔、鯖魚同茄子依啲小食都係新鮮整好，所以上到嚟熱辣辣。鯖魚份量好多，而且個皮烤得好香。而炸蠔就正正常常，都有佢嘅鮮味。茄子方面，面頭加咗好多蒜蓉，超級香口。