船皇 (厚福街) (Closed)

好耐冇食過船麵，今日lunch捉咗同事出嚟陪我食晏。但係呢度竟然有泰式車仔麵揀，咁就梗係要試吓啦。我自己揀咗個三餸麵，沙嗲湯底小辣。但係唔知點解我湯底勁淡，好少沙嗲汁。但係好彩加番晒啲船麵嘅調味料之後就好飲好多。而三個餸分別叫咗魷魚鬚，五花肉同埋豬肉丸。魷魚鬚個份量都幾多，唔會得一兩條，但係豬肉丸就真係太林，冇乜味。同事就叫咗個牛船麵，佢嗰碗睇落嘅色水靚好多，入邊有三款唔同嘅牛，分別有牛腩牛肉同埋牛丸，同樣地佢嗰啲牛丸都係冇乜味同埋太林。小食方面我哋加咗單骨雞翼，對方雞翼睇落去炸到好似好乾，但係其實食落都幾鬆脆嘅。另外我哋叫左個無骨鳳爪，你個鳳爪唔會太辣，啱啱好，幾爽脆。嘢飲方便就梗係一定要嗌泰式奶茶啦，我叫咗少冰，佢自動幫我走埋冰，真係好體貼。