Zappy (Closed)

銅鑼灣食既好多，搵到間高水準既就好難，今次比我搵到間，食完會記掛住既餐廳，就難上加難，而且環境仲要好舒服，好適合同你愛惜既人一齊去試下。餐牌上有好多菜式都好吸引，所以諗咗好耐先決定食咩，雖然無套餐，但可以自己整一SET出黎。一開始係一個每日鮮製濃湯，個晚係磨菇忌廉湯，應該係我暫時食過最好食既磨菇忌廉湯，香濃既菌香，入口細滑而有足夠磨菇蓉，比例非常好，份量十足。仲點咗一杯柚子梳打，甜度適中，淡淡柚子香。之後就到蒜香辣油活蜆天使麵，蜆十分鮮甜，淡淡既蒜香，有足夠既蒜片可以同天使麵夾住一齊食，滿足哂鐘意食蒜既我。最後主菜係香烤美國安格斯無骨牛小排，賣相一流，牛肉處理得好好，係我最鐘意既生熟程度，醬汁同牛肉好夾，連薯蓉一齊食，好有層次，由上至下味道都好夾。總結，當晚所有食物都非常好食，絕對係銅鑼灣平均水準之上，食完心情會開心左，離開時已經諗定幾時再去。