AFTER TEN (Closed)

今日想好好地享受me time，放空一下頭腦，所以就揀咗裝修好文青，好舒服嘅AFTER TEN坐下，食個lunch。一推門，彷彿同鬧哄哄嘅外界隔絕，好舒服，好安靜。加上佢有落地大玻璃，令到自然光可以打到入去餐廳，當一啲車經過嘅時候，可以係餐廳見到光嘅變化，令人感到平靜。餐牌琳瑯滿目，好多嘢都想試，可惜一個人食得唔多，最後嗌咗奶油雞肉磨菇可麗餅（$108）同熱宇治抹茶牛奶（$45）。奶油雞肉磨菇可麗餅上枱個陣嚇親，因為冇諗到係咁大份，仲要係漲卜卜嘅兩份添～ 好開心～ 可麗餅嘅邊邊位仲烤得好香脆，中間有醬汁嘅部分好軟熟，係我鍾意嘅軟度。內餡比得好足，雞肉大大舊，可以食到好香奶油味，菇都比得好多，仲用咗少少洋蔥同香草去炒添～ 好香～ 碟上仲有少少沙津菜refresh一下。食完成個可麗餅真係好飽好滿足～宇治抹茶牛奶有好靚嘅拉花，杯同杯墊都好靚，質感好好。其實刀叉同碟都有質感，感覺好優雅。可以飲到有濃嘅抹茶，有一定嘅厚度，牛奶又香又滑，飲落暖暖地好舒服～ 見到其他菜名都好吸引，下次有機會都想同朋友一齊嚟chill下、傾下計。