京.花朝 (Closed)

朋友畢業所以大鄉里出城去左山頂影相，落山後去左銅鑼灣搵野食，凍冰冰唔想食日本野，經過耀華街，見有京滬菜就拍板啦！食完仲可以落聰嫂食龍眼冰添（又話唔想食凍野？！）由於大概6點到，餐廳人潮唔多，店員們都好禮貌咁為我地介紹菜色，最後我地點左半隻片皮鴨，錦繡松鼠魚同一碟上湯蟲草花翡翠苗。片皮鴨首先上檯，我比較喜歡食連皮帶肉嘅部分，咬落每件都油香肉滑，而只帶皮部分亦香脆唔會過硬過肥，包埋甜麵醬同青瓜一齊食減低好多肥膩感，食多幾件都仲得！錦繡松鼠魚比較難操作，又考刀工，又考炸油又考拍粉，但一樣做得好出色，新鮮炸起魚身脆卜卜，點埋酸甜汁好開胃。最後一道上湯蟲草花翡翠苗，蟲草花性質平和，不寒不燥，含有豐富營養素，配上味道清新嘅翡翠苗，應該係輕輕炒過再淋上上湯煮，唔覺草味特別種，不錯。值得一讚嘅係店家服務好好，會時不時幫忙添茶，又主動提出比額外嘅櫈我地放手袋同褸，唔好嫌麻煩，抵讚！雖然位處銅鑼灣鬧市，又係食飯繁忙時間，但都無趕客走，食完後繼續比我地坐住飲茶傾計，讓我地過左個悠閒晚上