魂 (Moved) New Location

今日收工去左銅鐵灣行街街，行到去Times附近開始覺得餓餓地，本身想過登龍街食拉麵，但係朋友介紹話係鵝頸橋底有間隱世的拉麵店。見朋友咁推介，決定行過隔離街食！呢間拉麵店細細間，除左一張四人台外，就係7丶8個拉麵位。咁我地當然坐拉麵台位，可以望下師父點煮呀麻我就選左最傳統的「魂」，即係原味的濃豚骨湯。大約5丶6分鐘就有得食啦。先講個湯底先，豚骨湯好濃，有D稠身的感覺，但係飲落口覺得好舒服，唔會覺得太黏口。豬骨味好香，而且唔會好油膩，我個朋友重要所有湯都飲哂添。而個麵係選取曲身麵，彎彎的麵可以吸到大量的湯汁，可以盡情咁飲到好味的湯底。麵身煮得幾爽身，唔會太腍，而且份量都幾多，好抵！至於配料，主要係木耳丶叉燒同糖心蛋，叉燒肉味好濃，而且大大片，油香得黎唔算太肥膩。糖心蛋有流心的效果，蛋黃配上麵同湯底去食，又係另一種享受。