蔡潤記

Open Now

Now Closed

以前啲人成日講新蔡舊蔡，新蔡已經無做了，到左今時今日就只有一間蔡潤記 （其實一直都係得一間，明就明）。 好多人黎到都係食魚蛋或者牛腩，仲有炸魚皮。常見嘅叫法有：（1）牛腩河加淨蛋片（一碗牛腩河加一碗淨魚蛋魚片）；（2）魚蛋河加魚皮（留意返呢個加魚皮係加兩三舊炸魚皮，好似叫多個餸咁，而唔係一碟炸魚皮，如果想叫一碟嘅話要講清楚）（3）粉腸/牛肚都有唔少捧場客，例如腸蛋河、肚皮河都係常見組合。 而我就通常都係叫魚蛋河，叫魚蛋河已經包括有魚蛋同魚片，間唔中會加魚皮，主要係肚唔肚餓或者有無賣曬。黎到懷舊港式粉麵檔，當然要叫返支玻璃樽汽水先似樣，細可樂都係我指定項目之一。 以前嘅辣椒油係一碗粉麵配一小碟辣椒油，而家係一大罐放喺枱面。 唔知記得開始，食粉麵嘅第一個步驟係呷一啖湯，感受下每間舖頭獨有嘅嗰種清甜或者香濃。 魚蛋雖然細細粒，但係好夠魚味，當然唔會好似用機打嗰種強勁嘅彈牙感，但係就有手打嘅彈牙感。就好似整蛋糕手打同機器打咁樣，手打做得好都可以保持穩定水準，同時又會有多一種隨意又美麗嘅寛容度。