富豪酒家

Open Now

Now Closed

又到年尾又係時候慰勞吓自己，今日就同屋企人一齊去食鮑魚慶祝一下。睇中咗佢一個午市阿翁鮑魚美食套餐，係位於尖沙咀美麗華廣場一期4樓連續13年獲得米芝蓮1星餐廳，就即刻去訂位試吓出晒名嘅「阿翁鮑魚」。坐低開咗茶就係餐牌揀咗呢款$488嘅午市套餐。套餐份量午餐啱啱好，而且已經包括一份35頭鮑魚拼鵝掌。可算係超級抵食。先嚟一碗老火湯，非常濃郁，絕對唔係馬虎之作。之後有三件六揀三嘅點心。叫咗最鍾意嘅咸水角、蝦餃、燒賣。味道係以前細個食到嘅味道。主菜上場35頭鮑魚拼鵝掌非常之香。鮑汁非常之濃，火腿味十足。鮑魚已經煮到好淋，中心點仲有啲煙靭。鵝掌亦都煮到入曬味，果然係招牌菜。之後嗰荷葉飯都好好食，每一啖飯都入曬材料嘅味道，瑤柱、冬菇、雞粒都非常之香。最後甜品仲有蛋白杏仁茶、馬豆糕、核桃酥。杏仁茶非常之滑，而且蛋香味十足，為呢一餐寫上一個完美嘅句號。