Video
Read full review
2017-11-14
206 views
今日係一個特別既日子，所以一早就訂了這間想食好耐既日本餐~一開始，先了解一下今日既菜單大致上有什麼。全晚既人客唔多，正好適合喜愛寧靜，慢慢享受一頓晚飯既我倆。一開始師傅係碟邊放左兩款日本漬物，黃色係大家都熟識既醃蘿蔔，爽脆到不得了! 啡色既係味道好似魷魚肉鬆既蒜頭，蒜頭經醃製後己經完全沒有蒜頭濃烈既味道，剩下既只係爽口同甜甜既好味道。茶碗蒸- 入面有海苔、冬姑、大量魚子、瑤柱，同師傅傾談間知道一般日本餐廳食到既魚子會太咸係因為沒有經過處理，一到餐廳就UNPACK拎出去賣，但空運前由於要保鮮所以會加鹽，所以平時食既大多數都會覺得過咸。鮨文既三文魚子味道就剛剛好，每一啖都配幾粒魚子去食淡淡既蒸蛋，恰到好處，冬姑海苔瑤柱亦令鮮味更加提升，作為依一餐第一道菜，雖然只係簡單既茶碗蒸，但都做得咁好，確係令人對之後既菜都更加放心!鰤魚 (油甘魚)- 我相信唔需要我文字講解，淨係睇相都己經知道依兩片油甘魚既油份係有幾豐腴! 淡淡既魚味，肉質緊實之餘又油香四溢。秋刀魚卷- 秋天開始當然秋刀魚係當造既刺身! 終於見到師傅開始表演，用紫菜包住秋刀魚、酸薑、紫蘇葉、芝麻等配料，入口既味道非常有層次同複雜，但味
今日係一個特別既日子，所以一早就訂了這間想食好耐既日本餐~
一開始，先了解一下今日既菜單大致上有什麼。
全晚既人客唔多，正好適合喜愛寧靜，慢慢享受一頓晚飯既我倆。
一開始師傅係碟邊放左兩款日本漬物，黃色係大家都熟識既醃蘿蔔，爽脆到不得了!
啡色既係味道好似魷魚肉鬆既蒜頭，蒜頭經醃製後己經完全沒有蒜頭濃烈既味道，剩下既只係爽口同甜甜既好味道。
茶碗蒸- 入面有海苔、冬姑、大量魚子、瑤柱，同師傅傾談間知道一般日本餐廳食到既魚子會太咸係因為沒有經過處理，一到餐廳就UNPACK拎出去賣，但空運前由於要保鮮所以會加鹽，所以平時食既大多數都會覺得過咸。鮨文既三文魚子味道就剛剛好，每一啖都配幾粒魚子去食淡淡既蒸蛋，恰到好處，冬姑海苔瑤柱亦令鮮味更加提升，作為依一餐第一道菜，雖然只係簡單既茶碗蒸，但都做得咁好，確係令人對之後既菜都更加放心!
鰤魚 (油甘魚)- 我相信唔需要我文字講解，淨係睇相都己經知道依兩片油甘魚既油份係有幾豐腴! 淡淡既魚味，肉質緊實之餘又油香四溢。
秋刀魚卷- 秋天開始當然秋刀魚係當造既刺身! 終於見到師傅開始表演，用紫菜包住秋刀魚、酸薑、紫蘇葉、芝麻等配料，入口既味道非常有層次同複雜，但味道非常之夾!
北海道毛蟹- 新鮮北海道毛蟹拆肉加上大量蟹膏，拌勻後啖啖放入口都係好香既蟹膏味，折得好好一塊殼都無，十分幸福同安心享用。
中拖羅- 拖羅有幾好食唔洗多介紹，師傅係拖羅下面加入少少柚子，正好中和剛剛太濃既蟹膏餘韻。
燒大拖羅- 燒過既拖羅將油份充分迫出黎，除左加上蔥花之外，師傅仲會將燒完後碟上既油分都放埋落去，令我地完完整整咁享受依份大拖羅。
鱈魚- 鱈魚好嫩滑，橙色既醬係海膽加芝士製成既，甜甜地之餘亦都好香，蘆筍加左點鹽，蓮藕片炸完都咁薄，可見師傅既刀工，日本菜就係每一樣都整得好好食，無一樣係伴碟既配菜，同埋不得不讚既係每一碟小品既器具都好精緻，除左係味覺既享受之外，睇住師傅邊"表演"邊享受自己盤中既美食，真正既身心靈享受。
白子- 外型似一個腦，亦似扭埋一團既腸，但師傅一直都無講係咩食物，先叫我地去好好品嘗佢。除左見到既蔥同金箔之外，仲加左類似冷麵汁既醬汁，白子口感好似食緊蟹膏咁，當然味道唔似蟹膏，但相信鍾意食淋膏既人會好鍾意，聽聞亦都十分養顏。
最後發現佢係咩之後，覺得白子既名字都改得好貼題同優雅，究竟係咩? 留待你自己試完後再調查吧。
帆立貝- 天婦羅帆立貝加埋白海膽製成既手卷，帆立貝剛剛炸好，脆漿好薄但真係非常之熱，千萬唔好一啖放入口，一絲絲口感既帆立貝，加上軟綿綿既海膽，絕配既手卷!
~~食完刺身同小品後，就到壽司時間~~
竹筴魚- 灑上岩鹽後燒脆塊魚皮，除左令魚皮脆身之外，更將鹽燒落魚身，上面既係俄羅斯魚子醬，作用係帶出魚既鮮味。
黑睦 - 淡魚味既白身魚, 但師傅塗了一點醬汁後味道豐富清新了。
赤貝- 未開餐前己經見到師傅在花工夫準備既赤貝，師傅在上碟前會用手大力拍打赤貝令佢肌肉收縮，令佢咬落去更加爽口。
鰝鰺- 屬於深海池魚，上放了點花蕾, 吃起上黎有淡淡既花香同魚味, 師傅總是能夠將微妙既味道恰如其分地夾在一起。
酒蒸鮑魚- 係一款鮑魚兩食, 鮑魚煮淋左, 但又不失咬口, 旁邊既醬係由鮑魚肝煮成, 先將鮑魚點沾醬食用後, 再加入飯團拌勻食, 鮑魚肝非常香濃, 有在食蟹膏既感覺, 食材新鮮除左可以食到食物本身外, 連某D平時唔會進食既部位亦都可以加以運用，實在不得了。
三文魚子- 再一次品嘗，依然沒有多餘既咸味，師傅教正確的食法應該係用手將佢當酒杯拎起全倒入口中!
海膽杯- 我地心目中既"大佬"，因為食到依一道菜既時候其實己經8成飽了，雖然有咁多海膽係一件超幸福既事，但佢掩蓋既...係一碗白飯..所以同打大佬無分別
依個海膽杯亦有一個故事係背後，相傳話有一晚老闆飲左幾杯後同一位客人傾得興起，問到"試過好似裝到雪糕咁多既海膽未?"，就係咁 海膽杯就誕生了~ 之後仲係香港捲起熱潮，至今仲見到好多餐廳都有類似食品。
右口魚手卷- 左口魚壽司相信大家都經常食到，愛它既相信一定係愛佢滿瀉既油份，依件左口魚己經被師傅燒到完全"溶掉"，基本上係真正的入口即溶，同飯一齊食係食佢既油香，而唔係佢既肉體。
魚湯- 看似無特別既魚湯，一飲就知有幾足料! 魚湯內既膠質濃到相信放凍了碗湯會變JELLY。好濃，但絕對一點也不腥，食過刺身凍食後，最後一碗咁完美既熱辣辣魚湯，係一個最好既作結。
蜜瓜- 最後，當然亦有當造既果實畫上完美句號，一個字 甜!
全晚，由入座到每一道既菜我地都感到十分滿意，既能享受日本餐精緻細巧既味道，亦好似睇左一場表演一樣。
師傅同店員服務都很好，在食物上亦上了好多寶貴既課堂~
鮨文，令今晚這個特別的日子過得無悔了。
Post
