潮福蒸氣石鍋 (Closed)

同媽媽係西灣河睇完戲之後就去搵嘢食，行過見到間酒家門口個牌好吸引有定食嘅火鍋放題價錢一啲都唔貴，魚缸啲海鮮有好生猛，於是就上咗去2樓，睇到有啲滕織嘅帽咁嘅嘢係枱面，原來呢啲就係蒸氣石鍋於是我兩個就試試。有好多調味料各式各樣任選擇。粥底有三款，我哋揀咗滑雞淮山粥底。有送滋潤燉湯每人一盅，唔單止熱辣辣，湯味重好濃郁。定食三款之中，其中一款係媽媽最喜歡又最欣賞嘅脆皮乳鴿，皮脆有肉，肉質嫩滑，又醃得好入味，真係食過返尋味😋貝殼盛盤可以嘗試唔同種類嘅貝殼。海鮮有九款，可揀四款，象拔蚌有碗仔咁大,同埋的蟶子王足足有隻筷子咁長，面頭鋪滿好多蒜蓉，一齊放入口，零舍有一番風味😋可以任食嘅姬崧茸蒸雞同污糟雞好有口感又肉質嫩滑。和牛片同和牛粒好夠霖。有我至愛嘅糯米雞，真係好袖珍，一啖一口，糯米夠煙靭，好有口感。覺得呢間潮福蒸氣石鍋海鮮酒家唔單止海鮮生猛又夠新鮮，服務員態度一流👍下次有機會又拉大隊過嚟食先得。