魚米家魚湯米線 (Closed)

決定今年聖誕節正日唔食西餐，因為實在太唔抵，所以平平淡淡睇完戲來魚米家食飯。聖誕正日，八點幾，今晚鋪頭無乜客人，我估去晒食聖誕大餐。我地反而樂得清靜。由於琴晚去剧扒食左勁多肉，今日我同男友都想食番多啲菜，咁岩魚米家竟然有純蔬菜既飯餐，我地對眼簡直係發晒光！好喇介紹番個飯先。佢個魚湯，其實都預左有少少味精架喇，如果無，佢都大大隻字標榜話無添家味精啦係咪😂咁佢雜菜有七種菜：小棠，蕃茄，金針菇，冬菇，娃娃菜，粟米粒，西芹！聽到係咪哇哇聲先！佢種類多不但止，仲要份量好夠！菜份量又多，飯份量又多，我係中上大食既女仔都食剩一半飯！（利申：我食量拍得住一般男仔，平時大份茶餐廳炒粉面飯我一個人都食得晒）我今次都食剩半碗😱😱😱所以真係份量好多！聖誕節無加價都只係47蚊碗。另外，我個碗飯就無莞茜，得蔥。唔知其他人係咪。我都飲唔到個湯有莞茜味，所以怕莞茜味既人都岩食！如果連蔥都唔要，可叫佢走青架！