小漁港海鮮舫 鮮蒸‧鮮味火鍋

Open Now

Now Closed

10/9因為同親戚慶祝生日，所以走左去呢間。環境格局似小型舊式漁港主題酒樓。環境乾淨整齊，服務都ok。當時叫左398/1位嘅套餐，2人起跳。有幾多野食下，包括刺身，龍蝦，瀨尿蝦，海蝦，馬友，元貝，鮑魚，貝殼3款，蔬菜，鷄烏冬同粥，份量幾大下。首先係個刺身，魚同帶子冇乜特別，但係個主打象拔蚌係好明顯新鮮手切，清脆爽甜，會有少少海腥味，所以對魚腥味敏感嘅人有可能覺得有啲難受。然後服務生會上開始蒸海鮮，當中龍蝦可以食到佢嘅鮮甜味，再配有佢獨有嘅海咸味，肉質超爽脆。瀨尿蝦嘅話會比龍蝦冇咁爽，不過蝦身小孩手臂咁長，味道比龍蝦更加清甜，殼軟易剝，啖啖肉，連蝦鉗都有肉可以食。元貝同鮑魚反而冇乜特別，鮑魚比較淡口冇乜味，元貝正常。反而螺，花甲同蜆幾正下，無配料原味蒸，但係可以食到完全冇砂，仲要非常新鮮，有獨有貝殼嘅鮮甜得呢仲有海咸味，口感個個都係超彈牙超新鮮。粥嘅話又係重點，因為長時間煮，所以一出爐會係似潮州粥，非常黏口，而且因為有一堆龍蝦頭放入去一齊煮，所以會非常有蝦膏味。整體來講非常推薦，最好約三两個人一齊食會比較好。